Biografía de Pilar Citoler
1937- ZaragozaEstudou Medicina e Estomatoloxía nas universidades de Madrid e Zaragoza. Premio Nacional de Estomatoloxía da Universidad Complutense de Madrid. Impartiu a docencia na Cátedra de Estomatoloxía Médica.
Residente en Madrid desde os anos sesenta, o seu primeiro contacto coa arte contemporánea nace inspirado no modelo “conquense”. Os seus frecuentes contactos con esta cidade, nas datas inmediatamente posteriores á creación por Zóbel do Museo de Arte Abstracto Español de Cuenca (1966), móvena a adquirir a casa que fora de Eusebio Sempere. É neste lugar, con vistas ao meandro do Xúcar, onde comeza a súa colección de arte contemporánea.
Coleccionista desde hai corenta anos, o seu primeiro cadro adquíreo na Galería Juana Mordó en 1972, vinculándose tamén á Galería Ynguanzo. A partir desa data, vindica a importancia da pintura española, coleccionando tanto os artistas de “El Paso” como os do chamado “grupo de Cuenca”. Posteriormente, permaneceu moi atenta aos movementos artísticos que sucederon durante a chamada “movida madrileña”, coleccionando, como segue facendo agora, numerosos artistas novos. Non obstante, a súa colección non se detén neste punto. Visitante asidua das feiras internacionais de arte, entra en contacto cos autores do Pop norteamericano, dos que adquire relevantes pezas.
A súa colección, coñecida como Circa XX, composta por máis dun millar de obras, componse de obras de arte contemporánea, tanto nacionais como internacionais, e de moi diversos xéneros: pintura, escultura, bibliofilia contemporánea e gráfica. Na última década tivo cabida na súa colección o vídeo e a fotografía contemporáneas. Paris Photo acolle cada ano o Premio Bienal Internacional de Fotografía Contemporánea Pilar Citoler, que convocan a Universidad de Córdoba e a Junta de Andalucía e que edita a colección de ensaios fotográficos El Ojo que Ves, o último dedicado ao fotógrafo galego Vari Caramés. Ademais, é membro do Padroado da Alliance Française, fundando o seu Concurso Internacional de Fotografía.
Membro de Honra do Padroado do Museo Nacional Centro de Arte Reina Sofía (MNCARS) desde xaneiro de 2005. Recibiu ese ano o Premio ARCO ao coleccionismo privado en España. En 2006, a Universidad de Córdoba premiou tamén a traxectoria e, un ano despois, foille outorgada a Medalla de Ouro ao Mérito nas Belas Artes (2007). En setembro dese ano foi nomeada presidenta do Padroado do MNCARS.
Premio Santo Tomás de Aquino da Universidad de Córdoba (2006) e Cordobesa do Ano (2008). É presidenta de honra da Asociación de Coleccionistas Privados de Arte Contemporáneo de España. En 2013 foi nomeada Doutora Honoris Causa pola Universidad de Córdoba. Recibiu o Premio Arte y Mecenazgo de La Caixa ao coleccionismo privado. Ese mesmo ano alcanzou un acordo co Goberno de Aragón polo que integraba boa parte da súa Colección Circa XX.
