Xaneco Tubío

----

Xaneco Tubío


NOTA: Nesta páxina lístanse as referencias a unha persoa en diferentes proxectos, eventos ou publicacións do Consello da Cultura Galega. Trátase dun proxecto de etiquetado en continuo crecemento e ampliación, e que non está concluído. En ningún caso, a páxina pretende ser unha biografía da persoa mencionada nin incorporará materiais externos ao CCG ao respecto.

Biografía de Xaneco Tubío


Entra en contacto coa música tradicional nos anos oitenta, na Asociación Cultural de Outeiro de Rei, onde comeza a aprendizaxe como percusionista de xeito autodidacta.

Dende entón xa non se aparta do universo da música tradicional, ao longo destes anos sempre estiven a formar parte dalgún grupo (Aloia, Caldaloba…), na actualidade son membro dos Minhotos.

Comeza a facer instrumentos de percusión nos anos 90, achegando a utilización de madeiras autóctonas (pradairo, cerdeira, nogueira, freixo...) e a súa mellora, tanto en acabados como en sonoridade, e dende entón hai centos de grupos que usan os bombos e tambores coa marca Xaneco, tanto en Galiza coma no resto do Estado, Europa e América.

No ano 1994 promove a primeira Mostra de Artesáns de Instrumentos de Música Tradicional que se realizou en Galiza, que aínda hoxe ten continuidade en Pardiñas; xuntou este ano, na súa 22 edición, 30 artesáns galegos de todas as disciplinas.

Participante como relator en multitude de charlas, concertos didácticos e obradoiros por todo o país, relacionados coa música tradicional galega.

A constante do Obradoiro é a evolución, o estudo de instrumentos antigos e a súa reinterpretación para obter uns instrumentos de calidade óptima que sigan mantendo a esencia cultural galega.

En concreto, na construción de zanfonas o obxectivo principal é manter a morfoloxía propia do instrumento, para iso estudei varias das moitas zanfonas antigas que hai no noso país, e collendo como modelo unha delas, fixen unha reinterpretación e actualización, e elaborei un instrumento adaptado aos tempos que vivimos, sen perder a sonoridade e características da zanfona galega.

No ano de 2014 gaña o prestixioso Premio de Artesanía de Galicia Antón Fraguas, na súa X edición, organizado pola Deputación da Coruña, cunha zanfona que denomina “Carneifona”.